Денес во Приштина ќе се одржи седница на Собранието на привремените институции за гласање за избор на нова влада.
Седницата на Собранието е закажана за 10:00 часот, а изборот на влада е единствената точка на дневен ред.
Рокот од 15 дена за формирање влада тече од 11 октомври, кога претседателката Вјоса Османи му го даде мандатот на претседателот на Самоопределување Албин Курти да формира нова влада, а тој рок истекува денес.
Собранието во Приштина има 120 пратенички места, а за да биде избрана новата влада, за неа треба да гласаат 61 пратеник.
Седницата за гласање за избор на новата влада е закажана иако Уставниот суд во Приштина сè уште не донел одлука по жалбата на Српската листа против изборот на Ненад Рашиќ, претседателот на партијата за слобода, правда и опстанок, за потпретседател на собранието.
Рашиќ беше избран за потпретседател на парламентот од српскиот народ, иако неговата партија има само еден мандат од 10 мандати загарантирани за Србите, додека Српската листа има девет мандати.
Затоа, Српската листа поднесе жалба на 16 октомври и побара воведување привремена мерка.
Курти вчера не одговори на новинарско прашање дали го обезбедил потребниот број гласови за новата влада, додека некои претставници на Самоопределување изјавија во последните денови дека партијата нема потребен број гласови, но дека вложува максимални напори да обезбеди гласови до седницата на парламентот.
Според уставот на Косовои, доколку владата не биде избрана денес, претседателот мора да назначи нов премиер во рок од 10 дена, а доколку владата не биде избрана дури ни во втор обид, се распишуваат нови избори, кои мора да се одржат во рок од 40 дена од распишувањето.
Владата во Приштина не е формирана речиси девет месеци по парламентарните избори, а претседателот на парламентот беше избран дури на 26 август, по бројни прекини на конститутивната седница и одлуки на уставниот суд.
На изборите на 9 февруари, Самоопределување освои 48 места, Демократската партија на Косово 24, Демократскиот сојуз на Косово 20, а Алијансата за иднината на Косово и иницијативата Нисма осум места.
Српската листа има девет места, Партијата за слобода, правда и опстанок едно, а преостанатите 10 места им припаѓаат на претставници на другите немнозински заедници.
