Најмалку 19 лица се повредени во земјотрес со јачина од 6,1 степен според Рихтеровата скала, објави турскиот министер за здравство Кемал Мемишоглу.
Тој рече дека од 19-те повредени, четири лица се повредени поради скокови и падови и дека се пуштени дома откако биле примени во болница, објави Милијет.
„Сите повредени се во добра состојба и нивното лекување продолжува во болниците. Им посакувам брзо закрепнување“, рече Мемишоглу.
Според последните податоци, во земјотресот нема жртви, а се урнаа три згради и една продавница.
Земјотресот го погоди западниот дел на Турција доцна во понеделникот навечер во близина на градот Синдирги, а беше почувствуван и во Истанбул и во некои делови од Грција.
Очевидци велат дека земјотресот бил силен и траел долго време.
По главниот удар, следела серија послаби последователни потреси.
