Директорот на „Комунална хигиена“ на кого вчера му беше одреден 30-дневен притвор за кривично дело „загрозување на животната средина со отпад“ поднесе оставка, а градоначалничката на Град Скопје, Данела Арсовска денеска преку објава на Фејсбук прашува како ќе функционира претпријатието во следните пет дена.
– Како ќе функционира ЈП „Комунална хигиена“ во следните пет дена прашајте го премиерот Христијан Мицкоски кој лично од својот кабинет го наредува овој хаос кој воедно и го најави како интересна разврска на прес-конференција непосредно пред да се случи, напиша Арсовска на Фејсбук.
Му порача на премиерот да го повика Управниот одбор на Комунална хигиена чија претседателка, како што наведува, е осуден криминалец за две кривични дела да донесе одлука за разрешување на директорот и именување на вршител на должноста.
– Го прашуваме директно и базирано врз доказите кои граѓаните секојдневно ги изнесуваат во јавност: Дали е приведен директорот на Јавното комунално претпријатие Тетово за еко хаваријата што ја предизвика со отпадот во Вардар и зошто не? Дали е приведен директорот на Јавното комунално претпријатие Гази Баба за еко хаваријата што ја предизвика во Јурумлери со отпадот кој го фрла сред природа со општински камиони и зошто не? Дали е приведен директорот на ЈП Чистота и зеленило Куманово за еко хаваријата што ја предизвикува секојдневно со отпадот низ Куманово и зошто не?, прашува Арсовска.
Директорот на Комунална хигиена Сабахадин Рустеми, како што изјави неговиот адвокат, поднел оставка од морални причини и не ја дава затоа што се чувствува одговорен за ситуацијата со сметот, туку за да не влијае на истрагата.
Рустеми заедно со раководителот на секторот за отпад Аки Саити вчера добија 30-дневен притвор. Обвинителството ги сомничи за виновни согласно член 230 од Кривичниот законик.
