Земјите од Европската Унија не успеаја да се договорат за нова цел за намалување на емисиите до 2040 година , само неколку дена пред состанокот на министрите за енергија и клима, каде што треба да се одобри ставот на блокот, соопштија дипломати, според документи на ЕУ до кои  дошол Ројтерс .

Европската комисија се залага за намалување на емисиите на стакленички гасови за 90% до 2040 година во споредба со нивоата од 1990 година – цел што би ја ставила ЕУ на чело на глобалните напори за ограничување на климатските промени. Но, некои земји се плашат од економските последици за нивните индустрии , кои веќе страдаат од високите трошоци за енергија и конкуренцијата од трети земји.

„Ситуацијата е како одење по острица на нож“, рече европски дипломат цитиран од Ројтерс за веројатноста за постигнување договор пред самитот COP30 на 6 ноември.

Италија и Полска инсистираат дека целта од 90% е премногу рестриктивна и ги загрозува работните места , додека земји како Шпанија, Шведска и Холандија поддржуваат поамбициозни намалувања на емисиите .

За да се усвои новиот план за климата, потребна е поддршка од најмалку 15 од 27-те земји-членки .

На состанокот на амбасадорите во Брисел во петокот не беше постигнат никаков пробив , а конечните преговори ќе се одржат на 4 ноември , само два дена пред самитот во Бразил.

Главниот спор се врти околу тоа дали земјите од ЕУ можат да компензираат дел од своите емисии преку „јаглеродни кредити“ од земјите во развој.  Франција предлага 5% од намалувањето да биде покриено со такви кредити.  Германија поддржува 3%.  Данска и другите нордиски земји првично инсистираа на тоа дека воопшто нема такви механизми.

Европската комисија, во својот првичен нацрт, предвидуваше максимум 3% компензација , но според најновата верзија, не постои консензус ниту за процентот ниту за годината од која системот може да се имплементира.

Франција, исто така, предложи „итна сопирачка“ што би им овозможила на земјите да ја намалат вкупната цел за 3% ако европските шуми апсорбираат помалку CO₂ од очекуваното . Париз тврди дека ова би ги заштитило индустриите од ненадејна потреба од поголеми намалувања.

Доколку не се постигне договор пред COP30, претседателката на Европската комисија, Урсула фон дер Лајен, ќе се појави на форумот без специфична цел за ЕУ , што би го поткопало тврдењето на блокот дека е глобален лидер во борбата против климатските промени .

За споредба, Кина, Велика Британија и Австралија веќе ги објавија своите нови климатски цели, додека ЕУ го пропушти рокот на ОН минатиот месец поради внатрешни несогласувања.