Поранешниот албански премиер Фатос Нано почина денес на 73-годишна возраст, објавија албанските медиуми.
Медиумите објавија дека Нано бил на интензивна нега во една од приватните болници во Албанија, додека неговата здравствена состојба нагло се влошила во последните денови.
Нано доживеал срцев удар, а претходно бил лекуван од проблеми со дишењето.
Медиумите објавија дека тој бил еден од најважните политичари во посткомунистичкиот период на Албанија.
Роден е на 16 септември 1952 година во Тирана, а дипломирал политичка економија во 1974 година.
Во декември 1990 година бил назначен за генерален секретар на Советот на министри, а еден месец подоцна станал вицепремиер во владата на Адил Царчани.
Кон крајот на февруари 1991 година, Рамиз Алија му ја доверил функцијата премиер со задача да ја подготви транзицијата на земјата кон либерална демократија и пазарна економија.
По изборите на 31 март 1991 година, Нано доби мандат да формира влада, но тој остана на функцијата само неколку недели, поднесувајќи оставка поради бранот штрајкови што ја зафатија земјата.
Беше уапсен на 30 јули 1993 година и обвинет за „злоупотреба на службена должност и фалсификување на службени документи поврзани со италијанската помош“, а девет месеци подоцна беше осуден на 12 години затвор.
Немирите во 1997 година доведоа до негово ослободување од затвор, а три месеци по неговото ослободување ги доведе социјалистите до враќање на власт, која ја држеа осум години.
Нано остана премиер само една година, поднесувајќи оставка на 28 септември 1998 година, нешто повеќе од две недели по атентатот врз пратеникот на Демократската партија Азем Хајдари, што предизвика насилни протести во Албанија. Тој повторно стана премиер на 31 јули 2002 година и остана на функцијата до неговиот пораз на изборите во јуни 2005 година, кога беше принуден да му ја предаде власта на својот политички противник, кој некогаш го затворил, Сали Бериша.
