Европол, агенцијата за спроведување на законот на Европската Унија, врши притисок за забрзување на пристапот до алатки за вештачка интелигенција (ВИ) за поефикасно справување со сериозниот криминал , изјави заменик-извршниот директор на Европол, Јирген Ебнер, во интервју за „Политико“.
Тој рече дека криминалците во моментов уживаат во своето „најдобро време“ злонамерно користејќи вештачка интелигенција за извршување кривични дела, додека полицијата е ограничена од долги законски процедури во користењето на вакви алатки.
Според законот, европските власти мора да вршат проценки на заштитата на личните податоци и влијанието врз основните права на граѓаните, што ја одложува употребата на вештачката интелигенција до осум месеци, објаснува тој.
„Скратувањето на овој процес може да биде клучно во итни ситуации кога постои закана по човечкиот живот “, нагласува Ебнер.
Директорот на Европол се залага за забрзана постапка што би дозволила употреба на вештачка интелигенција „во итни случаи“ без да се помине низ „многу комплицирана постапка за усогласување“.
Ебнер прецизира дека таквата мерка сепак нема да ги заобиколи забраните за профилирање и препознавање на лица во реално време предвидени во Законот на ЕУ за вештачка интелигенција.
Во последните години, Европол значително го прошири својот технолошки капацитет, воведувајќи разни нови алатки за борба против криминалот – од анализа на големи збирки податоци до дешифрирање на комуникациите меѓу криминалните групи.
Според нејзиниот директор, агенцијата сака да „одговори со оган на оган“ во услови на брзорастечки сајбер криминал. Сепак, некои групи за човекови права предупредуваат дека одврзувањето на рацете на полицијата би можело да ги пречекори гаранциите за личните права на граѓаните.
Претседателката на Европската комисија, Урсула фон дер Лајен, веќе најави дека ќе го удвои бројот на вработени во Европол и ќе ја претвори агенцијата во „силен центар за борба против криминални групи кои дејствуваат и во физичкиот и во дигиталниот свет“.
Законодавниот предлог за зајакнување на Европол се очекува во вториот квартал од 2026 година.
Ебнер нагласува дека „скоро сите истраги сега имаат онлајн димензија“ и дека инвестициите во технологија и иновации претставуваат „огромен товар“ врз институциите за спроведување на законот.
И покрај плановите за проширување на улогата на агенцијата, тој беше категоричен дека на Европол нема да му бидат дадени директни полициски овластувања: „Не веруваме дека Европол треба да има овластување да апси луѓе или да врши претреси. Тоа нема смисла и не носи никаква додадена вредност.“
