Францускиот претседател Емануел Макрон изјави дека верува во можноста за прифаќање на трговски договор меѓу Европската Унија и Меркосур, економски блок што ги обединува неколку латиноамерикански земји.
„Јас сум доста позитивен, но останувам претпазлив бидејќи ги бранам и интересите на Франција“, изјави Макрон пред новинарите на маргините на конференцијата за климата што му претходеше на самитот COP30 во градот Белем, Бразил, објави Фигаро.
Меркосур е основан во 1991 година со цел подобрување на трговската интеграција, намалување на трговските бариери и создавање заеднички пазар меѓу неговите членови.
Блокот има за цел зајакнување на економските врски меѓу неговите земји-членки (Аргентина, Бразил, Парагвај, Уругвај, Венецуела и Боливија) и промовирање на слободна трговија и заеднички политики во областите на царината, транспортот и земјоделството.
Меркосур е еден од најголемите економски блокови во Латинска Америка, а неговите членови сочинуваат пазар од повеќе од 250 милиони луѓе.
Претставници од 170 земји одговорија на поканата за учество на самитот за климата COP30 во амазонскиот град, што е вовед во 30-тата конференција на ОН за климата што се одржува од 6 до 21 ноември, но делегацијата на Соединетите Американски Држави не е меѓу нив.
