Генералниот секретар на Обединетите нации, Антонио Гутереш, синоќа на самитот за климата COP30 во Белем изјави дека светот не успеал да го ограничи глобалното затоплување на 1,5 степени Целзиусови, како што е предвидено во Парискиот договор од 2015 година.
На отворањето на самитот, кој се одржува во Белем во северен Бразил, Гутереш рече дека неуспехот да се ограничи глобалното затоплување на зголемување од 1,5 степени Целзиусови во споредба со прединдустрискиот период претставува „морален неуспех“, објави телевизијата BFM.
Во врска со фактот дека 2025 година е втората или третата најтопла година досега регистрирана, Гутереш рече дека земјите „никогаш не биле подобро опремени за борба“.
Бразилскиот претседател Луиз Инасио Лула да Силва рече дека „прозорецот на можности“ за дејствување „брзо се затвора“ и ги осуди „лагите“ за кои рече дека ги шират „екстремистичките сили“ кои промовираат „деградација на животната средина“.
Претставници од 170 земји одговорија на поканата за учество на самитот за климата COP30 во амазонскиот град, што е претходница на 30-тата конференција на ОН за климата, која се одржува од 6 до 21 ноември, но делегацијата на Соединетите Американски Држави не е меѓу нив.
Од европска страна, се очекува на самитот да присуствуваат францускиот претседател Емануел Макрон, германскиот канцелар Фридрих Мерц, британскиот премиер Кир Стармер и принцот Вилијам.
Повеќето лидери на Г20, вклучувајќи ги и претставниците од Кина и Индија, нема да присуствуваат на самитот.
ООН објави дека преговарачите, научниците и граѓанското општество што учествуваат на COP30 ќе разговараат за приоритетните активности за борба против климатските промени, со фокус на напорите потребни за ограничување на порастот на глобалната температура на 1,5 степени, презентацијата на нови национални акциони планови и напредокот во спроведувањето на финансиските ветувања дадени на самитот за климата COP29, кој се одржа во Азербејџан.
