Централната изборна комисија (ЦИК) на Косово ги објави прелиминарните резултати од вториот круг од изборите, објави порталот „Радио Слободна Европа“.
Демократскиот сојуз на Косово победи во пет општини, Движењето Самоопределување и Алијансата за иднината на Косово во четири, Демократската партија на Косово во три, а Српската листа и турската партија КДТП освоија по една општина.
Кандидатот на Српската листа во Клокот, Божидар Дејановиќ, освои речиси 90 проценти од гласовите во вториот круг од изборите за градоначалник.
Лидерот на Српската листа, Златан Елек, рече дека тоа е „голема и историска победа“, бидејќи таа партија победи во сите десет општини со српско мнозинство на овие избори.
Претседателот на Централната изборна комисија, Крешник Радониќи, изјави дека се надева дека конечните резултати од вториот круг од изборите ќе бидат објавени за две недели.
„Конечните резултати ќе бидат објавени по пребројувањето на гласовите на дијаспората, лицата со посебни потреби и условните гласови“, рече претседателот на ЦИК.
На Косово денес заврши вториот круг од локалните избори, кој се одржа претежно мирно, без поголеми инциденти.
Гласачките места беа затворени во 19:00 часот, а според прелиминарните податоци од ЦИК, гласале 32,8 проценти од гласачите, или 479.000 граѓани од вкупно 1.316.672 запишани во регистарот на гласачи.
Во споредба со првиот круг одржан на 12 октомври, кога излезноста во истите општини беше 38,91 проценти, е забележано намалување од околу шест проценти.
