Уште една ескалација во кампањата против критичарите на Кремљ.
Русија означи организација основана во егзил од соработници на покојниот опозициски лидер Алексеј Навални како „терористичка организација“, што е уште една ескалација во кампањата против критичарите на Кремљ.
Москва го засили притисокот врз опозициските групи и луѓето поврзани со Навални, дури и по неговата смрт под нејасни околности во арктичкиот затвор во 2024 година, и покрај фактот дека сите значајни руски опозициски движења се наоѓаат надвор од земјата.
Навални, харизматичен активист против корупцијата, беше главен домашен политички ривал на претседателот Владимир Путин. Тој предводеше стотици илјади луѓе во анти-Кремљ протести и беше постојано апсен и малтретиран од властите.
Врховниот суд на Русија објави дека го класифицирал Фондот за борба против корупцијата – регистриран во Соединетите Држави и управуван од поранешни соработници на Навални – како „терористичка организација“, забранувајќи ги неговите активности во Русија. Судот рече дека структурата „имала за цел промовирање, оправдување и поддршка на тероризмот“.
Навални и неговите организации веќе се означени како „екстремисти“ – статус со слични правни последици што исто така ја забранува нивната работа на руска територија.
Како одговор, Фондацијата за борба против корупцијата изјави дека вистинските терористи се Владимир Путин и неговите соучесници – луѓето што ја започнаа војната, убиваа цивили и политички противници и фрлаа луѓе во затвор. Организацијата ја опиша одлуката како политички потег за потиснување на опозицијата и предупреди дека и други независни медиуми и групи за човекови права наскоро би можеле да бидат подложени на ист прогон.
Амнести Интернешнл во октомври, кога случајот беше поднесен во руски суд, истакна дека таков чекор „би можел да предизвика бран масовни репресии“.
Русија значително ја прошири својата кампања за замолчување на критичарите откако ја започна својата офанзива против Украина во февруари 2022 година.
Сојузниците на Навални тврдат дека необјавените лабораториски тестови покажуваат дека тој бил отруен и убиен во затвор. Москва ги отфрла сите тврдења дека Навални бил ликвидиран .
