Федерален судија во Флорида му дозволи на Министерството за правда на САД да објави документи од големата порота во судењето на Џефри Епштајн за трговија со луѓе, објави Ројтерс.

Ова би можело да фрли светлина врз врските на починатиот финансиер со богати и влијателни луѓе, вклучувајќи го и американскиот претседател Доналд Трамп. 

Конгресот, контролиран од републиканците, претходно усвои закон со кој се бара од државниот обвинител да ги објави сите некласифицирани досиеја поврзани со неговите истраги за Епштајн и неговата соработничка Гислен Максвел, која е во затвор по истите обвиненија.

Трамп, кој рече дека го прекинал пријателството со Епштајн долго пред апсењето на финансиерот во 2019 година, првично  се спротивстави на објавувањето на досиејата. Но, тој го промени својот став кратко пред пратениците да гласаат за законот, кој тој го потпиша на 19 ноември.

Досиејата со нетрпение ги бараат и политичките противници на Трамп и членовите на неговата сопствена база , кои се залагаат за поголема транспарентност во случајот.

Скандалот е проблем за Трамп со месеци, делумно затоа што тој ширеше теории на заговор за Епштајн меѓу своите поддржувачи пред да победи на реизборот во 2024 година.

Трамп неодамна го смени курсот и рече дека демократите  се обидуваат да го одвлечат вниманието од достигнувањата на неговата администрација.