Двете организации, исто така, ќе соработуваат за промовирање на производството на напредни вакцини во Африка, се вели во соопштението на Светската банка, што е во согласност со целта на Африканската унија до 2040 година 60 проценти од вакцините за домашни потреби да се произведуваат во Африка.
„Партнерството со Гави е важен чекор кон остварување на нашата цел да обезбедиме квалитетна здравствена заштита за 1,5 милијарди луѓе до 2030 година“, рече претседателот на Светска банка, Аџај Банга, нагласувајќи дека овие напори, покрај подобрата здравствена заштита, треба да донесат и нови работни места, економски раст и поголема отпорност на целиот здравствен систем.
Борбата за здравјето на најранливите
Гави е јавно-приватно партнерство кое помага во вакцинирањето на повеќе од половина од најсиромашните деца во светот.
„Нашата проширена соработка со Светската банка ја одразува нашата долгогодишна заедничка посветеност на поддршката на земјите во градењето стабилни и отпорни здравствени системи“, изјави извршната директорка на „Гави“, Санија Ништар.
Промени во американското финансирање
Американскиот секретар за здравство и човечки услуги, Роберт Ф. Кенеди Џуниор, во јуни изјави дека САД повеќе нема да обезбедуваат финансирање за „Гави“, обвинувајќи ја групата за наводно занемарување на безбедноста и повикувајќи ја да „ги оправда осумте милијарди долари што Америка ѝ ги доделила од 2001 година“.
Кабинетот на американскиот претседател Трамп, исто така, во април сигнализираше дека има намера да ја откаже годишната исплата од околу 300 милиони долари што САД досега ги доделија на Гави, како дел од пошироката програма за намалување на меѓународната хуманитарна помош.
Во јуни, Гави собра над 9 милијарди долари за својот проект за вакцинација на децата во текот на следните пет години, што е значително помалку од целта од 11,9 милијарди долари.
Донации за работата на Гави во наредниот период оваа година беа доделени, меѓу другите, од Германија и Норвешка и Фондацијата Гејтс, забележува Ројтерс.
Хрватска годишно придонесува со еден милион евра во програмата Гави и има намера да донира шест милиони евра на алијансата до 2030 година.
