Генералниот секретар на НАТО, Марк Руте, предупреди дека Русија претставува долгорочна безбедносна закана за Европа и дека е клучно Украина да остане воено силна за да се спречи поширока дестабилизација на континентот.
Во интервју за белгискиот весник „Де Морген“, Руте рече дека Москва е подготвена да издржи огромни човечки загуби за минимални територијални добивки, наведувајќи дека Русија, според него, годинава зазела помалку од еден процент дополнителна територија во Украина, додека губела околу 25.000 војници месечно.
Тој истакна дека Русија издвојува околу 40 проценти од својот државен буџет за одбрана, што изнесува приближно 200 милијарди долари годишно, проценувајќи дека таквото ниво на трошење ѝ овозможува на Москва да стекне повеќе оружје од европските земји во рамките на своите економски можности.
Руте, исто така, предупреди на, како што наведе, сè поагресивното однесување на Русија на источниот дел од НАТО, вклучувајќи хибридни напади и развој на хиперсонични ракети, кои летаат многу пати побрзо од звукот.
Според безбедносните служби, додаде тој, постои ризик од напад врз една од членките на Алијансата помеѓу 2027 и 2031 година.
Зборувајќи за Украина, Руте ги отфрли тврдењата дека САД ја суспендирале помошта за Киев, нагласувајќи дека споделувањето разузнавачки информации и испораките на оружје продолжуваат со полн интензитет.
Тој изјави дека промената првенствено се однесува на очекувањето дека Европа ќе преземе поголем дел од финансискиот товар, бидејќи војната се води во непосредното соседство на Европа.
Руте потврди дека на негова иницијатива е постигнат договор според кој европските земји и Канада ќе купуваат американско оружје и муниција за Украина.
Тој предупреди дека падот на Украина под руска контрола ќе бара значително поголеми трошоци за одбрана на долг рок од сегашните 3,5 до 5 проценти од бруто домашниот производ (БДП), нагласувајќи дека поддршката за Украина е најефикасниот начин да се спречи поширок конфликт.
Зборувајќи за можен мировен процес, Руте рече дека се водат интензивни разговори за силни безбедносни гаранции за Украина во случај на мировен договор без членство во НАТО.
Целта на овие гаранции, рече тој, е да се убеди рускиот претседател Владимир Путин никогаш повеќе да не се обидува со воена агресија врз Украина.
Руте додаде дека работи во координација со САД и европските сојузници за усогласување на ставовите за војната во Украина, оценувајќи дека зачувувањето на безбедноста на Украина е клучно и за кредибилитетот на НАТО и за долгорочната безбедност на Европа.
