Курти во разговор со поранешниот британски дипломат и политичар Рори Стјуарт предупреди дека Русија му се заканува на регионот преку Србија. „Од четири соседи, три нè признаваат. Само Србија не нè признава и не изгледа дека наскоро ќе го стори тоа. Иако мислам дека тие подобро од кога било разбираат дека сме држава. Реалноста многу се промени“, тврди тој.

„Она што мора да се случи е нивниот сон за враќање да згасне. Истото важи и за Руската империја или она што сега е Руска Федерација. Руската империја не сака соседи, но тоа е невозможно“, нагласи тој. Зборувајќи за северно Косово, Курти рече дека пред пет или 10 години немало слобода слободно да се оди или да се зборува на албански јазик во тој дел.

Тој верува дека треба да има поголема солидарност во рамките на европскиот континент и во самото НАТО, бидејќи, според неговите зборови, „Русија сака да ги уништи и двете, а Кина сака да ја достигне моќта на Соединетите Американски Држави“. „Секој што му помага на нашиот сосед во неговите напори за дестабилизација, ни предизвикува проблеми и нам“, рече тој.