Иран ги смета сите армии на Европската Унија за терористички групи, изјави денес претседателот на иранскиот парламент Мохамед Багер Калибаф, откако ЕУ ја прогласи паравоената Револуционерна гарда на Иран за терористичка организација поради насилно задушување на протестите во земјата, објави Тасним.
Калибаф оцени дека ЕУ „си пукала во нога“ и дека, според него, ја нарекла Гардата терористичка група „од слепа послушност“ кон САД.
Тој ја даде изјавата додека тој и другите членови на парламентот носеа униформи на Гардата, а во текот на целата седница се слушаа скандирања „Смрт за Америка“ и „Смрт за Израел“.
Зголемувањето на тензиите на Блискиот Исток доаѓа во време кога американскиот претседател Доналд Трамп ја разгледува можноста за воен напад врз Иран, а Техеран, исто така, најави воени вежби со боева муниција во Ормутскиот теснец, стратешки премин низ кој се движи значаен дел од светската трговија со нафта, објави Тасним.
