Европа мора да стане технолошки понезависна од САД, бидејќи регионот се соочува со промени во својот однос со најголемата економија во светот, изјави денес германскиот канцелар Фридрих Мерц.
Мерц во обраќањето пред политичките и бизнис лидерите во Франкфурт рече дека трансатлантските односи се промениле и дека никој не жали за тоа повеќе од него, објави Ројтерс.
„Но, носталгијата и сеќавањата на добрите стари времиња не ни помагаат да одиме напред“, рече Мерц.
Тој истакна дека земјите со пазари во проширување бараат она што Европејците имаат да го понудат – партнерства засновани на меѓусебно почитување и ценење, правила и сигурност.
„Ова укажува на патот напред, да, ќе го кажам тоа, кон суверена, слободна, мирна и економски просперитетна Европа во нов светски поредок“, рече Мерц.
