Маж, за кој се верува дека е државјанин на Србија, кој вчера пукаше во полицаец во Дортмунд, а потоа се забарикадираше во стан со своите три деца, утрово ѝ се предаде на полицијата по неколкучасовни преговори, објавија германските медиуми и телевизијата РТС .
Трите деца кои биле во станот не се повредени.
Полицаецот кој беше погоден во инцидентот претрпел полесни повреди, благодарение на панцирот што го носел.
По пристигнувањето на полицајците во станбена и деловна зграда во населбата Хехстен во Дортмунд, маж, според полицијата, пукал во полицаец, а потоа се забарикадирал во својот стан со своите деца.
Според вчерашните информации, мажот претходно извршил напад во ресторан, мавтајќи со палка, заканувајќи се на гостите и прскајќи ги со бибер спреј. После тоа, избегал со автомобил.
Кога полицијата, по повикот на жена која побарала помош, пристигнала во станбено-деловна зграда на улицата Витбројкер во населбата Хехстен, пред зградата излегол маж и наводно пукал во полицаец со пиштол од мал калибар.
„Еден проектил го погодил заштитниот елек на еден од ангажираните полицајци. Според досегашните информации, полицаецот во таа прилика претрпел полесни повреди“, изјавил портпаролот на полицијата, како што објави „Билд“ .
После тоа, осомничениот избегал во куќа, каде што ги држел децата како заложници.
