Се очекува САД и Иран, со посредство на Пакистан и Катар, а со учество на Египет и Турција, денес да одржат виртуелен состанок и електронски да потпишат меморандум за разбирање со кој ќе се продолжи прекинот на огнот за 60 дена, повторно ќе се отвори Ормутскиот теснец и ќе се започнат нови преговори за нуклеарната програма на Иран, објави синоќа Аксиос, повикувајќи се на извори.
Се очекува меморандумот за разбирање да придонесе за прекин на конфликтот во регионот и потенцијално да се стабилизираат глобалните енергетски пазари.
Според извештајот, ова е резултат на речиси тримесечни преговори меѓу Вашингтон и Техеран, кои беа посредувани од Пакистан, Катар, Египет и Турција.
Американски и извори од земјите посредници потврдија дека потпишувањето ќе се одржи виртуелно од логистички причини.
Пакистанскиот премиер Шехбаз Шариф во саботата на платформата X изјави дека страните се „поблиску до мировен договор од кога било досега“ и дека се очекува договорот да биде завршен во следните 24 часа, по што ќе следи електронско потпишување, а потоа и технички преговори следната недела.
Кратко потоа, пакистанското Министерство за надворешни работи потврди дека е закажана виртуелна церемонија на потпишување за недела.
Американскиот претседател Доналд Трамп претходно вчера на својата мрежа Truth Social изјави дека договорот е закажан за денес и дека, веднаш по неговото потпишување, Ормутскиот теснец ќе биде отворен за сите бродови.
Сепак, Корпусот на исламската револуционерна гарда (ИРГК) синоќа објави дека договорот меѓу Иран и САД нема да биде потпишан денес, отфрлајќи ги претходните тврдења на американскиот претседател Доналд Трамп, со оценка дека неговото инсистирање на тој рок претставува притисок врз иранскиот преговарачки тим.
