Одлуката на Сони да престане да произведува физички дискови за новите игри за PlayStation од 2028 година може сериозно да го загрози глобалниот пазар на користени видеоигри, чија вредност се проценува на околу 7,2 милијарди долари (околу 6,2 милијарди евра), според проценките на истражувачката фирма Dataintelo.
Се очекува пазарот на користени видеоигри да порасне на 13,8 милијарди долари до 2034 година, но префрлањето на големите производители на конзоли кон исклучиво дигитална дистрибуција може да го забави или целосно да го запре тој раст, објави CNBC.
Аналитичарот на Wedbush Securities, Мајкл Пахтер, изјави дека физичките копии на игрите, особено користените, претставуваат важен дел од пазарот бидејќи овозможуваат размена, препродажба и купување нови наслови по пониска цена.
Без дискови, тој бизнис модел би бил сериозно нарушен, што дополнително би им наштетило на трговците на мало со видеоигри.
Сличен став изрази и аналитичарот на Morningstar, Казунори Ито, кој верува дека пазарот на користени игри ќе продолжи да се намалува и на крајот може целосно да исчезне.
Сони објави на почетокот на јули дека сите нови игри за PlayStation ќе бидат достапни исклучиво во дигитална форма почнувајќи од јануари 2028 година, додека насловите објавени пред тој датум ќе продолжат да бидат достапни на дискови.
Компанијата вели дека одлуката го одразува растот на уделот на дигиталната продажба, која во фискалната 2025 година сочинуваше околу 80 проценти од вкупната продажба на комплетни игри за PlayStation.
Одлуката предизвика силни реакции од делови од гејмерската заедница, трговците на мало и застапниците за зачувување на видео игри, кои предупредуваат дека дигиталната дистрибуција ја ограничува можноста за препродажба, позајмување и зачувување на игри на долг рок, а воедно ги прави корисниците целосно зависни од дигиталните продавници и лиценците на издавачите, според CNBC.
