Архитектонското чудо вредно 6,7 милијарди долари, 24 километри долг прекуокеански премин, составен од два моста, подводни тунели и вештачки острови, постави 10 светски рекорди и драстично го намали времето на патување меѓу Џонгшан и Шенжен од 2 часа на само 30 минути, прнесува „Н1“. 
Естуарот на Бисерната Река, каде што Бисерната Река се влева во Јужното Кинеско Море, е едно од најгусто населените подрачја во светот. Ги опфаќа Хонгконг, Макао и 9 градови во покраината Гуангдонг, кои се разделени со широки водени површини, што го прави движењето меѓу нив исклучително тешко.
Врската Шенжен-Џонгшан, долга 24 километри, е осмислена да го реши токму тој проблем, поврзувајќи ги градовите Шенжен и Џонгшан, кои се наоѓаат на спротивните страни од естуарот на Бисерната Река.
Сепак, не станува збор само за еден долг мост. Во средишниот дел има подводен тунел што се протега меѓу два вештачки острови, додека мостовите го поврзуваат секој остров со градот на таа страна.
Со осум сообраќајни ленти кои овозможуваат брзина до 100 километри на час, оваа врска го скратува патувањето кое претходно траело 2 часа на само 30 минути. По 7 години изградба, проектот конечно беше отворен пред две години.
Според Кинеската глобална телевизиска мрежа, мостот Шенжен-Џонгшан поставил 10 нови светски рекорди. Не станува збор за класични рекорди како најдолг или најголем мост, туку за многу специфични инженерски достигнувања:
– Најголем распон кај целосно крајбрежен висечки мост со челични носачи – 1.666 метри
– Највисока конструкција на мост – 91 метар
– Најголемо навигациско растојание за морски мост
– Најголемо сидро за висечки мост на море – 344.000 кубни метри бетон
– Најголема брзина при тестирање отпорност на ветер кај висечки мост – 83,7 метри во секунда
– Најголема челична конструкција на мост со асфалтно поплочување од топла епоксидна смеса – 378.800 квадратни метри
– Најдолг двонасочен подводен тунел со 8 ленти – 5.035 метри
– Најширок подводен тунел од челична обвивка и бетон – до 55,6 метри
– Најголем единечен одливок за потопена цевка со челична обвивка со самозбиен бетон – 29.000 кубни метри по дел од цевката
– Најширока повеќекратно склоплива водена брана во форма на буквата „М“ користена за спојување на тунелските цевки – 3 метри
Покрај сето тоа, тунелскиот дел има и напредни безбедносни системи, меѓу кои нови технологии за гасење пожари и одведување чад.
Тим од 14 роботи постојано патролира низ тунелот, следејќи ги цевките и каблите што обезбедуваат непречено функционирање на целиот систем. Роботите можат дури и да следат сообраќајни несреќи. Во такви ситуации, тие можат да го насочуваат сообраќајот преку вградени звучници и да ја снимаат состојбата, испраќајќи ја снимката до далечински контролен центар.
Светлата долж ѕидовите исто така имаат систем за осветлување во боја. Кога сè функционира нормално, светат зелено, а во итни случаи стануваат црвени. Тие можат постепено да преминуваат од жолта во зелена боја по целата должина на тунелот за да им помогнат на луѓето полесно да го пронајдат правецот при евакуација.
