Русија се подготвува да прими голема пратка бензин од Индија, направен од руска нафта, откако украинските напади со беспилотни летала ги оштетија клучните руски рафинерии за нафта и доведоа до сериозен недостиг на гориво, објави „Фајненшл тајмс“.

Танкер со 42.000 тони бензин произведен во индиска рафинерија во државата Гуџарат се очекува да пристигне на нафтениот терминал на Белото Море во северна Русија во недела, според аналитичката фирма „Кплер“ . Веројатно тоа би била најголемата поединечна пратка увезен бензин во Русија од почетокот на тековната криза со горивото.

Рафинеријата е во сопственост на индиската компанија „Најара енерџи“, во која руската државна нафтена компанија „Роснефт“ има 49% удел. Се очекува повеќе од 90% од нафтата што рафинеријата ќе ја преработува до 2026 година да биде руска , според „Фајненшл тајмс“, кој ја истакнува необичната ситуација во која Русија увезува гориво произведено од сопствена нафта.

Украинските напади врз руските рафинерии го намалија домашниот капацитет за рафинирање за околу 40% , предизвикувајќи ја најлошата криза со горивото во земјата од распадот на Советскиот Сојуз. Продажбата на бензин беше ограничена во неколку региони во текот на летото, а во некои области возачите чекаа со часови или денови за да наполнат бензин. Кризата погоди околу 50 милиони Руси, според „Фајненшл тајмс“.

Кон крајот на јуни, руските власти официјално ги објавија плановите за увоз на гориво. Податоците од Кплер покажуваат дека индискиот бензин бил натоварен на танкерот Агни на 18 јуни, а на 6 јули товарот бил префрлен на бродот Гарнет покрај брегот на Египет. Од 22 јули, Гарнет се движел на север покрај Норвешка.

На почетокот на јули, Ројтерс објави дека најмалку 60.000 тони бензин биле испратени од Индија во Русија, количина еквивалентна на приближно 60 проценти од дневната потрошувачка на земјата. Индиските резерви се само еден од неколкуте извори на странско гориво кон кои се свртува Москва поради ограничените домашни капацитети.