Демонстрантите во Париз го блокираа пристапот до историскиот музеј Лувр поради тековните демонстрации во Франција, јавува агенцијата Франс Прес.
Зградата беше затворена од мобилизирани ученици од училиштето „Екол ду Лувр“, изразувајќи ја својата „поддршка“ за движењето на средношколците и осудувајќи ја „полициската репресија“.
Фотографиите од утринските демонстрации објавени на социјалните мрежи покажуваат ученици од училиштата за уметност и култура како држат транспаренти пред стаклената пирамида на кои пишува: „Француските јавни услуги се уриваат“.
„Туристите што чекаат се агресивни кон нас затоа што ги платиле билетите “, рече еден од демонстрантите.
На леток изложен пред музејот пишува: „Гордо објавуваме дека го блокираме најголемиот музеј во светот“.
Низ целата земја, над 2.330 лица беа приведени во текот на викендот, од кои 70% беа возрасни, изјави министерот за правда Џералд Дарманин.
Се смета дека повеќе од 2.000 продавници биле погодени од насилството во Франција, а штетата се проценува на „стотици милиони евра“, објасни Ален Ди Крешенцо, претседател на Трговската и индустриската комора.
Протестите првично започнаа минатиот месец со студентски демонстрации против условите во образовните институции низ целата земја, но потоа се проширија и опфатија поширок спектар на прашања, како што се трошоците за живот и инфлацијата.

