Светскиот тенор Хозе Карерас заедно со македонските музички ѕвезди ја запеа „Едно име имаме“ пред преполниот Плоштад Македонија во Скопје, во еден од најемотивните моменти на големиот концерт по повод 35 години независност на Македонија.
Светски познатиот тенор застана заедно со македонските изведувачи, а кога започна изведбата на „Едно име имаме“, целиот плоштад се претвори во голем хор.
Публиката со овации ја проследи заедничката изведба, која беше еден од највпечатливите моменти на свечената вечер.
Карерас вечерва настапи на Плоштад Македонија во срцето на Скопје, пред илјадници граѓани, како главна ѕвезда на концертот организиран по повод 35-годишнината од независноста на државата.
Пред настапот на Карерас, публиката уживаше во настапите на голем број македонски музички имиња.
Градскиот плоштад беше огромна сцена под ѕвездено небо, со музичари на Македонската филхармонија, под диригентската палка на Сашо Татарчевски и оркестрации на Николче Мицевски.
На сцената настапија Влатко Стефановски, Каролина Гочева, Калиопи, Ана Дурловски, Игор Дурловски, Наум Петрески и Сузана Спасовска, а дел од најавениот состав беа и Маја Оџаклиевска и Миле Кузмановски.
Македонските изведувачи настапија во придружба на Македонската филхармонија, со повеќе од 60 музичари.
Посебен момент на вечерта беа настапите со македонските музички ѕвезди Каролина Гочева и Калиопи. Заедничките изведби предизвикаа огромен аплауз и беа меѓу највечатливите моменти на концертот кој беше во патриотски, национален тон, и со изборот на песните и со преносот на МТВ каде на моменти се вееше македонското знаме.
Големиот тенор (79) имаше енергија и се врати на сцената дури три пати за бис. Последниот пат беше изненадување – со сите македонски изведувачи Миле Кузмановски, Сузана Спасовска, Наум Петрески, Дешира Амети-Крлиу, Маја Оџаклиевска, Каролина, Калиопи, Влатко Стефановски и Ана и Игор Дурловски, го испеа рефренот на песната „Едно име имаме“, а диригираше гостинот од Шпанија, Давид Хименез.
Публиката со овации го испрати Карерас, во вечер која ќе остане запаметена како посебен музички настан во Скопје.

