Косовската полиција уапси девет лица рано утринава во општина Зубин Поток под сомнение дека извршиле воени злосторства.
Во заедничкото соопштение на Специјалното обвинителство во Приштина и Косовската полиција се наведува дека, како дел од истрагата за случај на воени злосторства, Дирекцијата за истрага на воени злосторства – поддржана од други специјални единици на Косовската полиција и постапувајќи по налог на Специјалното обвинителство – спровела операција со кодно име „Досие 23“ во општина Зубин Поток во раните утрински часови.
„Како резултат на оваа операција, уапсени се девет (9) лица осомничени за кривичното дело ‘воени злосторства против цивилното население’“, се додава во соопштението.
Беше наведено дека јавноста ќе биде информирана за деталите во врска со операцијата и преземените дејствија штом информациите ќе можат да бидат објавени.
Од крајот на јули, тројца Срби се уапсени во областа на Зубин Поток под сомнение за извршување воени злосторства, а судот на привремените институции во Приштина им одреди едномесечен притвор.
Косовската полиција спроведе рации и претреси во неколку села во општина Зубин Поток; за време на овие операции, одредени Срби беа приведени и задржани без можност да контактираат со адвокат.
Жителите на селата во општина Зубин Поток изјавија дека се изложени на отворено заплашување и закани за нови апсења.

