Полицијата ноќеска  во голем број е присутна во повеќе објекти и на повеќе локации во Скопје и Струмица, а според неофицијални информации, се работи за акција поврзана со неодамнешната рекордна заплена на марихуана во Србија, кои според српските власти, потекнуваат од фабрика за медицински канабис од Македонија.

„МВР во координација со ОЈО ГОКК презема соодветни мерки и активности на локации во Скопје и Струмица во врска со опојна дрога. Повеќе детали по завршувањето на активностите“, велат од МВР за Пресс24.

Како што известиja повеќе медиуми  во тек  е полициска опсада на повеќе објекти и локации во Струмица и Струмичко, а воедно и објектот во Скопје во поранешниот комплекс „Охис“ е целосно запоседнат од властите  од четврток вечерта.

Наводно вклучени се повеќе институции полиција, царина, здравствени служби и јавно обвинителство а се насочени кон мрежата на т.н. „легални“ производители на канабис кои со години ја злоупотребуваат дозволената дејност.

За сега нема потврди, нема деманти. Премиерот Мицкоски денес при изјавите за медиуми не сакаше да се впушта во детали за марихуаната запленета во Србија, што говори дека во позадина била опсежна акција на МВР. Повеќе информации се чекаат во текот на утрешниот ден