„Мислам дека е фер да се каже дека е шокантно колку длабоко сме навлегле во тие магацини“, изјави сенаторот за американската телевизија Си-Би-Ес њуз.

Кели рече дека американскиот претседател Доналд Трамп ги вовлекол САД во војна со Иран „без стратешка цел, без план, без временска рамка, а ние потрошивме многу муниција на тоа“.

Кели, истакнат член на Комитетот за вооружени сили на Претставничкиот дом, се повика на извештаи од Пентагон во кои се детално опишани залихите на специфични ракети, вклучувајќи ги „Томахавците“, „АТАКМС“, „СМ-3“ и оние што се користат во системите „Патриот“. Тој рече дека ќе бидат потребни „години“ за да се обноват тие залихи, без да прецизира конкретни бројки.

Тој предупреди дека САД можеби нема да бидат во можност да се одбранат во случај на долготраен конфликт. САД тогаш би се нашле „во полоша позиција“ отколку ако „оваа војна во Иран не се случеше“, рече Кели.

Пентагон моментално бара одобрение за значително зголемување на трошоците за одбрана. Предлог-буџетот на администрацијата на Трамп за фискалната 2027 година предвидува речиси 1,5 трилиони долари трошоци за одбрана.

Кели го опиша ова како „скандалозно“, велејќи дека буџетот на Пентагон изнесувал 700 милијарди долари кога тој се приклучил на Сенатот пред пет и пол години, пренесува ДПА.

Според Пентагон, војната во Иран ги чинела САД приближно 25 милијарди долари до крајот на април. Оваа бројка ги претставува проценетите вкупни трошоци од нападот на САД врз Иран кон крајот на февруари, при што најголемиот дел од нив се потрошени за муниција.