Цртеж од албум за скици од фламанскиот мајстор Петер Паул Рубенс, кој ги прикажува римските улици од времето кога живеел во тој град, е изложен во неговиот роден град Антверпен, фрлајќи нова светлина врз делото на големиот барокен сликар, пишува Гардијан.
Уникатен двостран лист со цртеж од едната страна и делумен нацрт од писмото на задната страна беше претставен на јавноста за прв пат.
Куростаторот на Музејот Рубенсхајс, Ан ван Камп, верува дека цртежот веројатно потекнува од блок за скици што Рубенс го користел за време на престојот во Рим, каде што живеел со својот брат Филип во близина на Шпанските скали.
Од едната страна е брза, спонтана скица нацртана со кафеаво мастило на која се прикажани тројца мажи во класични облеки, за кои се смета дека се апостолите.
На врвот од страницата има неколку дебели, назабени линии, за кои се смета дека се направени кога Рубенс го пробал своето перо.
Не е познато дали трите фигури се појавуваат во некое друго дело од Рубенс, и не е јасно дали уметникот ги замислил или копирал нешто што го видел во Рим.
На задната страна е нецелосен нацрт на писмо до италијанскиот сликар Кристофоро Ронкали, кој бил ангажиран од нивниот заеднички патрон, Елеонора де Медичи, војвотка од Мантуа, да наслика дело за нејзината приватна капела.
Рубенс бил вработен како сликар на дворот во Мантуа помеѓу 1600 и 1608 година.
Во писмото, кое е датирано во септември 1607 година, Рубенс, тогаш 30-годишен, го прашува постариот уметник за напредокот на сликата во име на неговиот патрон.
Двостраниот лист е вреден додаток на изложбата во домот на Рубенс, кој содржи само два цртежа и 10 писма од Рубенс, сите од подоцнежен период.
Делото може да се гледа како дел од „Искуството на Рубенс“, интерактивна изложба во музејот, но е предвидено да биде изложено во неговиот дом во Антверпен кога повторно ќе се отвори по обемните реновирања, не порано од 2030 година, според „Гардијан“.
Листот со тетратката е купен за Белгија од Фондацијата „Крал Бодуен“ за 110.000 евра, помалку од цената што се бара од 145.000 евра, а американскиот сопственик се согласил на тоа бидејќи делото е наменето за јавно изложување.
