Секторот за информатичка и комуникациска технологија (ИКТ) во Европската Унија продолжува да расте стабилно и покрај глобалните економски флуктуации, а минатата година во ЕУ беа вработени рекордни 10,45 милиони ИКТ професионалци, што претставува точно пет проценти од вкупниот број вработени на европскиот пазар на трудот, објави денес Евростат.
Анализата на Евростат покажува дека дигиталниот сектор доживеа вистинска експлозија за време на пандемиските години.
Најсилниот раст на бројот на вработени е забележан во 2020 година, кога изнесуваше дури 7,1 процент, а во 2021 година со раст од 5,7 проценти, поради масовното преминување кон работа од дома и забрзаната дигитална трансформација на бизнисите.
По тој период, пазарот делумно го изгуби почетниот моментум и влезе во помирна фаза.
Годишниот раст помеѓу 2022 и 2024 година беше околу четири до 4,5 проценти, додека во изминатата година се забави на 2,6 проценти.
Географската карта на Европа открива огромни разлики меѓу земјите-членки кога станува збор за учеството на ИТ-персоналот во економијата.
Шведска повторно е лидер на листата, со дури 8,9 проценти ИКТ-експерти во вкупната работна сила, веднаш по неа следуваат Луксембург со 8,7 и Финска со 7,8 проценти.
На самото дно на европската скала се наоѓаат медитеранските и некои источноевропски земји.
Најнизок удел на ИТ-експерти е забележан во Грција, каде што тие сочинуваат само 2,5 проценти од работната сила, додека малку подобри резултати се забележани во Романија со 2,7 проценти и Италија со 3,8 проценти.
Кога станува збор за родовата еднаквост, огромното мнозинство вработени на ИКТ-позиции во Европската Унија се уште се мажи, со дури 80,5 проценти, додека жените зафаќаат само 19,5 проценти од работните места, според веб-страницата на Евростат.
Сепак, ситуацијата полека се менува, при што уделот на жените се зголемува за три процентни поени во споредба со пред десет години.
