Акциите на „Викторијас сикрет“ скокнаа за околу 40 проценти во претпазарното тргување денес, откако брендот за долна облека објави резултати за првиот фискален квартал кои ги надминаа очекувањата на Волстрит.
Прилагодената заработка по акција (EPS) изнесуваше 60 центи, повеќе од двојно од очекуваните 30 центи, со приход од 1,56 милијарди долари, надминувајќи ја консензуалната проценка од 1,52 милијарди долари, објави CNBC.
Нето добивката на „Викторијас сикрет“ за тримесечниот период што заврши на 2 мај изнесуваше 47,7 милиони долари, што е огромен пресврт во однос на загубата од 1,66 милиони долари во истиот период минатата година.
Извршната директорка Хилари Супер изјави дека компанијата постигнала стабилен, двоцифрен раст на продажбата во сите сегменти, вклучувајќи продавници, дигитални канали, козметика, брендот „Пинк“ и меѓународна продажба.
Интересно е што најголемиот раст е забележан кај две сосема различни групи потрошувачи – оние со годишни приходи под 50.000 долари и оние што заработуваат над 200.000 долари, што укажува дека потрошувачите се привлечени од самиот производ, а не од ниските цени или промоциите.
Особено е успешен кај помладите потрошувачи, поточно кај оние на возраст од 18 до 24 години.
Покрај одличните квартални резултати, компанијата значително ги зголеми и своите изгледи за продажба и профит за целата година.
Викторијас Сикрет сега очекува продажбата за целата година да достигне помеѓу 7,03 милијарди и 7,13 милијарди долари, што е зголемување во однос на претходната прогноза од 6,85 милијарди и 6,95 милијарди долари.
Проектираната прилагодена оперативна добивка исто така е зголемена за повеќе од 100 милиони долари и сега се проценува дека е во опсег од 550 милиони до 580 милиони долари.
По неколку тешки години во кои брендот се соочи со жестока конкуренција од стартапи и јавни критики за нереалните стандарди за убавина што ги промовираат неговите модели, стратегијата на Хилари Супер да го врати брендот кон својот основен идентитет – секси, но пред сè, удобна долна облека – почнува да носи сериозни профити, забележува CNBC.
