Продажбата на електрични возила (EV) произведени во Кина на „Тесла“ порасна за 39,4 проценти во мај на годишно ниво.
Ова е седмиот последователен месец на раст и ја потврдува отпорноста на американскиот производител на зголемената конкуренција од домашните кинески брендови, објавува „Ројтерс“.
Според податоците од Кинеската асоцијација на производители на патнички автомобили (CPCA), фабриката на „Тесла“ во Шангај испорача 85.982 возила „Модел 3“ и „Y“ во мај, вклучувајќи автомобили наменети за извоз, што е за 8,2 проценти повеќе отколку во април.
Скокот на продажбата е забележан во исто време кога бројот на регистрации на возила на „Тесла“ се зголеми на неколку европски пазари, по послабите резултати во претходните месеци.
Од друга страна, кинескиот производител на автомобили „BYD“ продолжи да го зголемува своето присуство на меѓународните пазари, особено во Европа, дополнително зголемувајќи го конкурентскиот притисок врз странските автомобилски компании.
Аналитичарите велат дека конкуренцијата на пазарот сè повеќе се префрла од ценовна конкуренција кон развој на нови технологии и напредни системи за помош на возачот.
Кинеските производители остваруваат брз напредок во овој сегмент, додека „Тесла“ сè уште чека регулаторно одобрение од кинеските власти за да ги имплементира своите најнапредни функции за автономно возење.
Таквото одложување би можело да влијае на конкурентската позиција на американската компанија на најголемиот пазар на електрични возила во светот, велат експертите.
Кина останува еден од најважните пазари на „Тесла“, а фабриката во Шангај е клучен производствен и извозен центар на компанијата за азиските и европските пазари.
