Владата попладнево со реакција по палењето на две возила со дипломатски таблички пред Бугарската амбасада во Скопје. Бараат брза и ефикасна истрага и кривична одговорност за сторителите.
– Ваквите постапки претставуваат напад врз принципите на безбедноста, дипломатските односи и меѓународното право и не смеат да имаат место во демократска држава. Надлежните институции веќе преземаат интензивни мерки за целосно расчистување на случајот и откривање на сторителите.
Како Влада сакаме да испратиме јасна порака дека секој обид за предизвикување тензии, ширење омраза или нарушување на безбедноста ќе биде максимално санкциониран.
Државата има капацитет и ќе одговори со целосна сила на институциите и нема да дозволиме поединци да ја нарушуваат репутацијата на Македонија, стои во реакцијата од Владата.
Од Противпожарната единица на Град Скопје за „360 степени“ изјавиле дека пожарот е изгаснат со едно противпожарно возило и со тројца пожарникари. Според информациите оттаму, пожарот брзо бил изгаснат и нема штета на околните објекти.
