Турската полиција приведе 27 лица како дел од истрагата за наводни неправилности во издавањето градежни дозволи поврзани со проекти на конфискуваната градежна компанија на затворениот градоначалник на Истанбул, Екрем Имамоглу, објавија ДПА и агенцијата Анадолу.

Полицијата спроведе рации во Истанбул и во две други провинции, насочени кон општински службеници, градежни компании и компании за надзор на градежни работи. Еден од осомничените е во странство.

Според Канцеларијата на главниот обвинител во Истанбул, истрагата е поврзана со наводите дека неколку проекти во населбата Бејликдузу во Истанбул добиле дозволи за користење и покрај прекршувањата на прописите за градење и зонирање.

„Имамоглу Инсаат“ – градежната компанија претходно во сопственост на семејството на Екрем Имамоглу – беше запленета од турските власти во 2025 година по апсењето на градоначалникот на Истанбул како дел од поширока истрага за корупција.

Оваа истрага е дел од поголема истрага за она што обвинителството го опишува како криминална мрежа поврзана со Имамоглу – кој се смета за потенцијален противник на долгогодишниот турски претседател Реџеп Таип Ердоган.

Екрем Имамоглу постојано ги негира обвинувањата против него и ги опишува истрагите и судските случаи како политички мотивирани.