Едно лице е убиено, а друго е во критична состојба по пукотница во неделата во областа Сан Педро Сквер во калифорнискиот град Сан Хозе , популарно место за забава каде што се наоѓа една од официјалните фан зони за Светското првенство, соопшти полицијата, цитирана од Ројтерс.

Во времето на инцидентот на големите екрани не се прикажувале натпревари од Светското првенство. Единствениот натпревар во денот завршил околу 14:00 часот по локално време , неколку часа пред пукањето.

Полицијата соопшти дека една од жртвите починала на самото место, а втората била префрлена во болница со повреди опасни по живот. Случајот се истражува како убиство.

Областа беше блокирана по инцидентот, а неколку околни улици беа затворени за сообраќај. Повеќето објекти во областа исто така беа затворени.

Репортер на Ројтерс на местото на настанот видел силно присуство на полиција, бројни патролни возила и жртва која била изнесена на носилка од страна на екипи за итни случаи.

Еден обезбедувач, кој побарал анонимност, рекол дека го видел тешко повредениот маж веднаш по пукањето.

„Човекот сè уште стенкаше. Имаше крв на вратот и горниот дел од грбот“, рече тој, додавајќи дека полицајците разговарале со обезбедувањето и сведоците на инцидентот.

Плоштадот Сан Педро е една од неколкуте локации во областа на заливот Сан Франциско каде што ќе се одржуваат масовни јавни проекции на фудбалски натпревари за време на Светското првенство. Областа досега е домаќин на пет натпревари.