Заменик-претседателот на Советот за безбедност на Русија, Дмитриј Медведев, изјави дека Финска е додадена на списокот на цели за потенцијални нуклеарни напади откако е укината забраната за увоз на такво оружје во земјата , пренесува ТАСС.

„Финска ја укина забраната за увоз на нуклеарно оружје. Што менува ова за Финците? Само една мала работа: нивната земја сега е на списокот на цели за руското нуклеарно оружје. Радувај се, Финска, го достигна врвот на безбедноста!“, напиша Медведев во својата објава.

На 17 јуни, финскиот парламент го одобри предлог-законот на владата со кој се овластува увоз на нуклеарно оружје во земјата.

На почетокот на јуни, Полска и Литванија потврдија дека ќе учествуваат во дискусиите за нивната потенцијална улога во нуклеарното одвраќање на НАТО, кое е изградено околу американското нуклеарно оружје во Европа. Во тоа време, Полска негираше какви било планови за распоредување нуклеарно оружје.

Според „Фајненшл тајмс“, Полска и балтичките држави Естонија, Латвија и Литванија, кои се најблиску до Украина, се заинтересирани за потенцијално сместување на бази за американски авиони со двоен капацитет кои можат да носат конвенционални или нуклеарни боеви глави.