Силен топлотен бран што со денови го зафаќа јужниот дел од Европа ја претвори летната сезона во вистински тест за пожарникарите. Големи шумски пожари се активни на повеќе локации во Грција, Хрватска и Словенија, а високите температури, сушата и силниот ветер дополнително ја отежнуваат борбата со огнената стихија. НА сила во повеќе региони како и во МАкедонија е забрана за движење во шумските појаси.
Најзагрижувачка е состојбата во Грција, каде што во изминатите денови избувнаа повеќе пожари. Нов голем пожар вечерва се приближи до Солун, при што беа евакуирани неколку населби северно од градот. Огнот брзо се прошири поради силниот ветер, а густ чад го покри западниот дел на градот. Во гаснењето се вклучени повеќе од сто пожарникари со десетици возила.
Дополнителни пожари беа регистрирани и на Халкидики, една од најпосетуваните туристички дестинации за македонските граѓани, како и во централниот дел на Грција. Во дел од погодените подрачја властите наредија евакуација на населени места, а пожарите зад себе веќе оставија и човечки жртви.
Во Хрватска, пожарникарите со денови интервенираат на јадранските острови и крајбрежјето. По пожарите на островот Вис, нови огнени жаришта се појавија и на Хвар, каде што високите температури и силниот ветер го зголемуваат ризикот од брзо ширење на пламените јазици. Туристичките служби внимателно ја следат состојбата, а властите апелираат на максимална претпазливост.
Со пожари се соочува и Словенија, особено во крашкиот регион, каде што поради исклучително сувата вегетација и временските услови пожарникарите интервенираат на повеќе локации, додека надлежните предупредуваат дека опасноста останува висока.
Според Европскиот информативен систем за шумски пожари (EFFIS), годинава во Европската Унија веќе изгореле повеќе од 118.000 хектари земјиште, а бројот на пожари е значително над повеќегодишниот просек. За периодот до 8 јули прогнозите покажуваат екстремна опасност од пожари во делови од Медитеранот и западниот Балкан.
Два нови пожари – над селото Белица на границата со Јасен и над филтер станицата во Штип
За македонските граѓани кои летуваат во Грција или на Јадранот, препораките се редовно да ги следат известувањата на локалните власти, да избегнуваат движење во шумски предели за време на најголемите горештини и строго да ги почитуваат забраните за палење оган на отворено.
Метеоролозите предупредуваат дека високите температури ќе продолжат и во наредните денови, што значи дека ризикот од нови шумски пожари низ регионот останува исклучително висок.
