Хантер Бајден, син на поранешниот американски претседател Џозеф Бајден, денес го обвини американскиот претседател Доналд Трамп и членовите на неговото семејство за корупција и злоупотреба на моќ, изнесувајќи низа тврдења на социјалната мрежа X за наводни судири на интереси и деловни врски на семејството Трамп.
Бајден напиша по повод прославата на Денот на независноста на САД дека земјата се ослободила пред 250 години од владеењето на крал кој ги владеел колониите како семеен бизнис, оценувајќи дека за година и пол семејството Трамп го направило „(британскиот) крал Џорџ III да изгледа како аматер“.
Потоа изнесе низа обвинувања против синовите на американскиот претседател, Доналд Трамп помладиот и Ерик Трамп, кои имаат раководни позиции во Организацијата Трамп, објавува Индепендент.
Според неговите тврдења, компанијата во која инвестирал Доналд Трамп помладиот добила заем од Пентагон од 620 милиони долари, додека компанијата за развој на беспилотни летала основана од Доналд помладиот и Ерик Трамп добила профитабилен договор со американските воздухопловни сили.
Бајден, исто така, изјави дека американската војска нарачала мотори за беспилотни летала од компанија во чиј одбор на директори е Доналд Трамп помладиот, и дека Пентагон доделил договор од 24 милиони долари на компанија за роботика каде што Ерик Трамп е главен советник за стратегија.
Тој, исто така, го обвини зетот на Трамп, Џаред Кушнер, дека неговите деловни активности се финансиски поддржани од Саудиска Арабија и други земји од Заливот, наведувајќи дека Кушнер, кој бил висок функционер во администрацијата задолжен за надворешна политика за време на првиот мандат на Трамп, преговара со земјите што инвестираат во неговите деловни проекти.
Бајден, исто така, се осврна на финансиските извештаи за средствата на американскиот претседател објавени минатата недела, тврдејќи дека Трамп остварил околу 1,4 милијарди долари приход од тргување со криптовалути за време на неговата прва година на функцијата.
Тој изјави дека повеќе од еден милион луѓе изгубиле вкупно 2,3 милијарди долари инвестирајќи во овие проекти, проценувајќи дека парите не биле создадени, туку само префрлени „од џебовите на граѓаните во кралската ризница“.
На крајот од објавата, Хантер Бајден го обвини Доналд Трамп помладиот дека можел да добие финансиски придобивки од можните измени во прописите за огнено оружје што би дозволиле нивно доставување по пошта.
Во исто време, тој ги критикуваше судските власти за, како што тврди, недостатокот на истраги за семејството Трамп, наведувајќи дека самиот тој со години бил предмет на федерални истраги, сослушувања на голема порота и конгресни истраги.
Хантер Бајден истакна дека, и покрај годините истраги, властите против него не пронашле докази за обвинувањата изнесени од републиканците, додавајќи дека дури и приходите што ги остварил од продажбата на своите слики биле предмет на истраги во Конгресот.
„Вистинското прашање е старо 250 години – дали Америка припаѓа на едно семејство“, рече Бајден.
„Индипендент“ објави дека побарал коментар од Белата куќа и Организацијата Трамп, но не добил одговор.
Портпаролката на Белата куќа, Ана Кели, минатиот месец ги отфрли обвинувањата поврзани со заемот од Пентагон, тврдејќи дека Трамп и неговата администрација ги донесуваат сите одлуки исклучиво во интерес на американскиот народ и оценувајќи дека критичарите ги повторуваат годините на тврдења од демократите и традиционалните медиуми.
Во интервју за телевизијата CNBC, кое го даде во пресрет на 250-годишнината од потпишувањето на Декларацијата за независност, Трамп ги отфрли обвинувањата за корупција и рече дека не е запознаен со бизнисот со криптовалути на својот син.
„Јас не водам свој бизнис. Моите деца го водат“, рече Трамп, додавајќи дека неговиот син Ерик го води семејниот бизнис.
Хантер Бајден отвори профил на социјалната мрежа X во мај оваа година и оттогаш постојано јавно го критикуваше претседателот Трамп.
Откако Трамп неодамна повторно го спомена, алудирајќи на неговото турбулентно минато, Хантер Бајден одговори со нова објава во која упати дополнителни обвинувања против американскиот претседател и неговото семејство.
