Европската банка за обнова и развој (ЕБОР) денеска соопшти дека и одобрила заем од 30 милиони евра на Црна Гора за модернизација на патната инфраструктура преку воведување интелигентни транспортни системи (ИТС).
Средствата ќе бидат искористени за поставување дигитални системи за следење на сообраќајот, контрола на тунелите и патиштата, метеоролошки мониторинг, собирање податоци за сообраќајот и формирање на национален центар за управување со сообраќајот.
Целта на проектот е да се зголеми безбедноста на патиштата, да се подобри управувањето со сообраќајот и да се овозможи на возачите и институциите пристап до информации во реално време.
Новите системи треба да овозможат побрза реакција во вонредни ситуации и поефикасно управување со сообраќајните текови.
ЕБОР наведува дека проектот ја поддржува дигиталната трансформација на Црна Гора и конвергенцијата кон европските стандарди, истовремено зајакнување на сајбер безбедноста и отпорноста на инфраструктурата на климатските промени, вклучително и подобро следење на екстремните временски услови.
Во реализацијата на проектот ќе учествуваат Министерството за транспорт на Црна Гора, државната компанија Монтепут и Управата за сообраќај.
ЕБОР на својата веб-страница наведува дека досега има инвестирано околу 1,1 милијарда евра во Црна Гора преку 114 проекти, со што ја поддржува инфраструктурата, одржливиот развој и регионалното поврзување.
