Неговите пораки од таа платформа, која стана клучно место за објавување политички одлуки, честопати влијаат врз движењата на пазарите, од акции до нафта, пишува CNN .

Систем за пренос на податоци за клиенти

„Трамп Медиа“ објави дека нов систем за пренос на податоци, познат како API (интерфејс за програмирање на апликации), ќе стане достапен за институционалните клиенти почнувајќи од 1 август. Конкурентските социјални мрежи исто така нудат сличен пристап до своите податоци на маркетерите.

„Пазарите веќе реагираат на најавите на Truth Social“, рече Кевин Мекгурн, привремен извршен директор на TMTG. „Truth API овозможува директно и лиценцирано стримување на највлијателните „Truths“ од платформата во реално време. Со тоа, истовремено ја унапредуваме нашата стратегија за монетизација на сопствените средства преку конзистентни приходи со висока маржа“, додаде тој.

Предност од неколку милисекунди

Трговците на Волстрит користат алгоритми кои бараат специфични сигнали и автоматски извршуваат тргувања. Способноста за пристап до информации дури и дел од секундата порано може да им донесе значителен профит на таквите алгоритамски трговци.

Компанијата соопшти дека системот ќе лиценцира податоци од најпопуларните профили на Truth Social и ќе им доставува објави на клиентите „во рок од милисекунди“.

Компанијата наведува дека со нудење побрз пристап, ќе ги зголеми своите приходи.

Овој потег се смета за нов пример за преплетување на приватните деловни интереси на претседателот со неговите должности во Белата куќа.

Влијание врз пазарот и вредноста на акциите

Изјавите на претседателот за Иран и Ормутскиот теснец претходно влијаеја на пазарот на нафта. Неговите најави за царини во пролетта 2025 година предизвикаа пад на акциите, додека најавите за откажување од некои царини ги зголемија нивните добивки.

Акциите на „Трамп медиа енд технолоџи груп“ паднаа за околу 1,5 проценти во попладневното тргување во четврток, што е намалување од речиси 30 проценти од почетокот на годината.