Квалитетниот, длабок сон е еден од главните фактори за нашето добро здравје. Секако, постојат повеќе од една или две корисни навики кои ни помагаат да спиеме подобро. Се испоставува дека една од нив е поврзана и со нашата изложеност на дневна светлина.
Резултатите од студијата , објавени во списанието NPJ Biological Timing and Sleep, покажуваат дека постарите возрасни лица изложени на посветла и поконзистентна дневна светлина имаат тенденција да заспиваат порано, да се будат порано и да спијат подлабоко во првиот дел од ноќта.
Податоците се базираат на 500 дена набљудување на 89 возрасни лица кои носеле светлосни сензори и уреди за пратење на спиењето, а воделе и дневни дневници за спиење. Откриено е дека учесниците кои поминале повеќе време на посветла дневна светлина имале тенденција да заспиваат и да се будат порано од оние кои биле изложени на помалку светлина. Покрај тоа, луѓето изложени на поконзистентна дневна светлина, исто така, пријавиле поздрави времиња за спиење и подлабок сон на почетокот на ноќта.
Сепак, не е изненадувачки што наодите на научниците во тековната студија се во согласност со она што тие веќе го знаат за влијанието на светлината врз внатрешниот часовник на телото.
Џенифер Мартин, клинички психолог и професор на Медицинскиот колеџ Херберт Вертхајм, вели дека утринската светлина е особено корисна бидејќи помага во одржувањето на конзистентен циклус на спиење. Затоа препорачува да поминувате време надвор рано во текот на денот кога е можно.
„Изложеноста на сончева светлина рано во текот на денот е навистина корисна за здрав сон. Редовната утринска светлина им помага на луѓето да се чувствуваат поспано во исто време секоја вечер и да изградат добри навики за спиење“, додаде таа, цитирана од Фокс њуз .
Таа вели дека ограничувањето на изложеноста на силна светлина навечер може да помогне и во подобрувањето на сонот, препорачувајќи избегнување на изложеност на силна светлина во последните неколку часа пред спиење и придржување кон конзистентно време за будење секое утро.
