Германските компании планираат малку помалку отпуштања во јули отколку во претходниот месец, но пазарот на трудот е сè уште под притисок, според извештајот објавен денес од Институтот за економски истражувања (Ифо) со седиште во Минхен.
Вредноста на индексот што ги мери плановите на компаниите за отпуштања и вработувања се зголеми од јунските 92,2 поени на 93 поени, но сè уште е под клучниот праг од 100 поени, што значи дека повеќе компании планираат отпуштања отколку што вработуваат нови работници.
Истражувачите проценуваат дека пазарот на трудот во Германија останува под притисок и дека е потребен посилен економски раст за негово закрепнување.
Отпуштањата продолжуваат да доминираат во преработувачката индустрија, со исклучок на производителите на компјутерска, електронска и оптичка опрема, кои имаат намера да го зголемат бројот на работници.
Во трговијата, индексот се подобри малку, но плановите за намалување на бројот на вработени сè уште преовладуваат, и во трговијата на големо и во малопродажбата.
Покрај тоа, услужниот сектор, исто така, забележа мало закрепнување на индикаторите, но компаниите сè уште најчесто планираат да го намалат бројот на вработени.
Работодавците во угостителската индустрија се особено претпазливи, додека адвокатските и даночните консалтинг фирми планираат нови вработувања.
Немаше значителни промени во плановите за вработување во градежниот сектор, а плановите за вработување и отпуштање се приближно избалансирани, соопшти Ифо на својата веб-страница.
