Американскиот претседател Доналд Трамп во неделата во разговор со новинарите на „Ер Форс Уан“ изјави дека разговорите со Иран ќе продолжат денес и потврди дека наредил откажување на „масовен напад“ врз земјата.
„Тие знаеја за обемот на нападот бидејќи видоа како се подготвуваме. Сега работиме на разговор со нив, преговараме, а тоа започнува во понеделник попладне. Ќе видиме“, им рече Трамп на новинарите на „Ер Форс Уан“ во неделата по викендот во неговиот голф клуб во Бедминстер, Њу Џерси, објави CNN.
Трамп рече дека сојузници како Саудиска Арабија, Обединетите Арапски Емирати, Катар, но и Иран, го замолија да го откаже планираниот напад.
„Бевме целосно подготвени, но кога сојузниците побараа да се откаже, рековме: „Добро, ќе видиме“. Причината зошто побараа откажување е затоа што мислат дека има договор“, рече Трамп, додавајќи дека има договор за Ормутскиот теснец, а потоа ќе има договор за нуклеарната програма, или како што рече тој, „денуклеаризација на Иран“.
Саудискиот престолонаследник Мохамед бин Салман разговараше по телефон со Трамп и повика на деескалација на конфликтот, објави саудиската државна новинска агенција во неделата.
Претходно, неименувани извори изјавија за Си-Ен-Ен дека саудискиот принц изразил загриженост во врска со плановите за напад врз Иран за време на повикот.
Иранските државни медиуми негираа дека побарале од Трамп да ги запре планираните напади.
„Трамп, будалата, остана без бензин“, објави полуофицијалната новинска агенција Фарс во неделата.
Според новинската агенција Мехр, израелската телевизиска мрежа Канал 13 емитуваше извештај во кој се споменува можноста за недостиг од пресретнувачки ракети во Соединетите Држави и дека ова прашање може да биде причина за одлуката на Трамп да се повлече од конфликтот со Иран.
