Иран нема да се согласи на отворање на Ормуцкиот теснец сè додека САД не ја променат својата политика кон Техеран и не исполнат шест ирански барања, изјави денеска секретарот на Врховниот совет за национална безбедност на Иран, Мохамад Багер Золгхадр.
Золгхадр рече дека Вашингтон мора да „го корегира своето однесување“ пред Иран да дозволи нормална пловидба низ Ормуц, ни кој минува една од најважните светски линии за поморски транспорт на нафта и гас.
Иранските барања вклучуваат крај на заканите против врховниот лидер на Иран, трајно запирање на американските воени операции против Иран и неговите регионални сојузници и повлекување на американските поморски и воздухопловни сили вклучени во она што Техеран го нарекува блокада на Иран.
Иран, исто така, бара обештетување за штетите предизвикани за време на неодамнешните конфликти, укинување на американските санкции и ослободување на замрзнатите ирански средства.
Золгхадр рече дека барањата ја одразуваат волјата на иранскиот народ, наведувајќи ги митинзите одржани низ целата земја во текот на изминатите шест дена.
„Врховниот совет за национална безбедност нема да се откаже од овие барања, ниту во војна ниту во преговори“, рече Золгхадр.
Неговите коментари доаѓаат во време кога разговорите за иднината на пловидбата во Ормуцкиот Теснец засега не доведоа до конечен договор. Иран во последните недели се обидува да обезбеди поголема контрола врз сообраќајот низ Теснецот, додека САД ги отфрлија иранските барања за ограничување на преминот на американски бродови.
САД и Иран со посредство на Пакистан и Катар на 18 јуни потпишаа меморандум за разбирање, кој имаше за цел да ги прекине активните непријателства и да го отвори патот за поширок политички договор.
Според условите објавени во тоа време, Иран требаше повторно да го отвори Ормуцкиот Теснец, а САД требаше да ја укинат својата поморска блокада. Договорот, исто така, повикуваше на продолжување на преговорите за безбедна пловидба и други спорни прашања.
Имплементацијата оттогаш е во застој, а двете страни се обвинуваат меѓусебно за кршење на договорот.
Контролата на Ормуцкиот Теснец стана едно од главните прашања во стратегијата на Иран кон САД. Голем дел од светскиот извоз на нафта поминува низ Теснецот, па секое нарушување на пловидбата има големо влијание врз енергетските пазари.
Преговорите за повторно отворање на Теснецот продолжуваат со регионално посредништво, но засега нема индикации дека Вашингтон и Техеран се блиску до договор за условите на Иран.
