Агентите на Службата за имиграција и натурализација на САД (ИЦЕ) наскоро би можеле да добијат ракавици кои може да предизвикуваат електрични шокови. Ракавиците би нанесувале до 30 електрични шокови од 380 волти, што е околу трипати повеќе од напонот на стандарден штекер во САД.
За набавка на овие ракавици, наречени Емитер со генериран низок излезен напон (ГЛОВЕ), ИЦЕ планира да потроши до 20 милиони долари. Според Министерството за внатрешна безбедност на САД, договорот, за кој не е потребен јавен тендер, ќе биде објавен утре.
Ракавиците би ги користеле агентите на ИЦЕ, кои се вклучени во борба против меѓународните криминални организации, како и оние кои се одговорни за апсење и депортирање на лица кои ги кршат законите за имиграција на САД.
Ракавиците предизвикуваат остар електричен шок со кој агентите можат да го принудат некого на послушност „преку болка“, но првенствено се замислени да имаат одвраќачки ефект. Тие се активираат со притискање на копче и предизвикуваат шок само кога ќе дојдат во контакт со кожа. Според производителот, уредите не предизвикуваат повреди и веќе ги користат неколку полициски оддели во САД.
Упатството препорачува да не се користат ракавиците кај постари лица, мали деца, бремени жени и лица со тежок инвалидитет. Исто така, се препорачува да биде присутен втор полицаец за да го ограничи лицето за време на употребата.
Организацијата за човекови права АЦЛУ се изјасни против употребата на овие ракавици од страна на имиграциските агенти.
„Во текот на изминатата година, ИЦЕ покажа дека е подготвена да го игнорира законот и пребрзо да употреби сила, со катастрофални, а понекогаш и фатални последици и за цивилите и за луѓето без правен статус“, изјави заменик директорката за полициска политика во АЦЛУ, Џен Ролник Борчета.
Според неа, давањето на агентите за имиграција средство за нанесување силна болка на луѓето е рецепт за поголема штета на јавноста и помала контрола.
ИЦЕ е изложена на критики по неколкуте фатални инциденти за време на операции и апсења. Така, во јули, за време на амтимиграциските операции беа убиени две лица – Мексиканец во Тексас и Колумбиец во Мејн.
