Повеќе од 100 летови се откажани во Нов Зеланд поради силна бура и ветрови со сила на ураган, кои предизвикаа сообраќајни метежи и прекини во снабдувањето со електрична енергија низ целата земја.
Најголемите прекини, како што објави порталот Радио Зеланд, се во областа Велингтон, каде што силните ветрови предизвикаа откажување на домашни и меѓународни летови, како и на фериботскиот сообраќај низ Куковиот Проток.
Неповолните временски услови доведоа и до затворање на неколку патишта на Јужниот Остров, вклучувајќи ги и автопатите што минуваат низ планинските превои Линдис, Артурс и Луис, каде што се очекуваат обилни снежни врнежи.
Според податоците од државната метеоролошка служба МетСервис, налетите на ветерот во некои делови од земјата достигнуваат брзина од 120-137 км/ч.
Бурата собори дрвја, оштети покриви на станбени згради и оштети далноводи.
Според компаниите за електрична енергија, приближно 3.000 корисници во регионот Велингтон и повеќе од 6.300 во регионот Таранаки останале без струја. Властите ги повикаа жителите да избегнуваат непотребни патувања, да бидат внимателни на патиштата и да се држат подалеку од паднати далноводи.
Во Лоури Беј беа предизвикани лизгања на земјиштето, многу мостови беа затворени, а посетителите на стадионот Волтер Неш беа евакуирани како мерка на претпазливост откако бурата го прекина снабдувањето со електрична енергија.
Според временските прогнози, силни ветрови, обилни врнежи од дожд и снег ќе продолжат во многу региони до крајот на денот, по што временските услови постепено ќе почнат да се подобруваат.
