Австралија презема правни мерки против Телеграм поради наводниот неуспех на платформата да отстрани материјал што поддржува тероризам, изјави австралиската комесарка за онлајн безбедност Џули Инман-Грант, цитирана од Би-Би-Си.
Таа рече дека платформата се соочува со казна до 54,6 милиони австралиски долари поради неисполнување на своите безбедносни обврски според Законот за безбедност на интернет . Таа рече дека платформата оставила содржина поврзана со некои од најскандалозните акти на екстремистичко насилство во поновата историја достапна на интернет долго откако била официјално известена за проблемот. Таа нагласи дека ниедна платформа не е над законот.
Екстремистичката содржина за која Инман-Грант вели дека е достапна на Телеграм вклучува видеа од пукотниците во џамиите во Крајстчерч во 2019 година и Бафало, Њујорк, во мај 2022 година, како и видеа од егзекуции.
Порано оваа недела, Русија го обвини основачот на Телеграм, Павел Дуров, за поддршка на тероризмот. Во 2024 година, Дуров беше уапсен и формално испитан во Франција за наводен неуспех во вршењето соодветна контрола (модерација) врз апликацијата за спречување на криминални активности.
Инман-Грант рече дека нејзината агенција побарала информации од Телеграм за неговите мерки за борба против терористички и екстремистички материјал уште во март 2024 година, но се соочила со пет многу тешки месеци без одговор. Иако платформата подоцна почнала да соработува, таа одржувала средина погодна за ширење на екстремистичка содржина, објасни таа.
Портпаролот на Телеграм изјави дека обемните напори на платформата за борба против тероризмот се добро документирани, додавајќи дека компанијата ќе ги оспори тврдењата на австралиските власти на суд.
