Германија и Австрија се залагаат европските операции на популарната видео-платформа TikTok – која е во сопственост на кинеска компанија – да бидат ставени под европска контрола.
Претставници од двете земји во средата објавија дека се залагаат за сопственичка структура која би обезбедила европска контрола врз податоците и алгоритмите на TikTok.
Оваа популарна социјална мрежа е во сопственост на компанијата ByteDance, со седиште во Пекинг.
Германскиот министер за култура и медиуми, Волфрам Вајмер, и австрискиот државен секретар за дигитализација, Александар Прол, во заедничка изјава ја изразија својата поддршка за „иницијативата за европеизација на TikTok“, повикувајќи ги и другите земји да им се придружат.
Иницијативата следи по договорот постигнат во јануари помеѓу Соединетите Држави и ByteDance за формирање заедничко вложување – со мнозинска американска сопственост – кое ќе управува со работењето на платформата во САД.
Во февруари, Вајмер предложи европските операции на TikTok да преминат во европски раце. Тогаш, како можно решение, тој предложи конзорциум од медиумски компании. Како причини за оваа иницијатива, Вајмер и Прол наведоа загриженост во врска со заштитата на податоците и влијанието на големите платформи врз јавното мислење.
Тие предупредија дека, со оглед на тоа што TikTok е во сопственост на кинеска компанија, останува нејасно во која мера кинеската влада може да пристапи до податоците на европските корисници.
Преку алгоритмите за препорачување содржина, големите платформи значително влијаат врз тоа што гледаат луѓето и во која мера се шири одредена содржина.
Европската сопственичка структура би требало да овозможи контрола не само врз податоците на корисниците, туку и врз технолошката инфраструктура на платформата.

