Светската здравствена организација (СЗО) денес објави дека повеќе од 1.000 пациенти починале додека чекале итна медицинска евакуација од Појасот Газа од јули 2024 година.
Генералниот директор на СЗО, Тедрос Гебрејесус, изјави дека ОН и нејзините партнери евакуирале повеќе од 10.600 тешко болни пациенти од Газа од почетокот на војната, вклучувајќи повеќе од 5.600 деца, но дека голем број луѓе сè уште чекаат да бидат евакуирани за лекување, објави „Тајмс оф Израел“.
Повикувајќи се на податоци од Министерството за здравство на Газа, Гебрејесус рече дека најмалку 1.092 пациенти починале додека чекале медицинска евакуација помеѓу јули 2024 година и 28 ноември 2025 година, предупредувајќи дека бројот веројатно е потценет.
Тој апелираше до повеќе земји да примат пациенти од Газа и повика на продолжување на медицинските евакуации на Западниот Брег, вклучувајќи го и Источен Ерусалим.
Според претходните проценки на СЗО, на повеќе од 16.500 пациенти сè уште им е потребен третман надвор од Газа, додека „Лекари без граници“ изјавија дека вистинскиот број може да биде многу пати поголем.
До почетокот на декември, повеќе од 30 земји примија пациенти од Газа, но мнозинството беа прифатени од мал број земји, вклучувајќи ги Египет и Обединетите Арапски Емирати.
