„Наредувам од денес, по дванаесет години, знамето на Европската Унија повторно да се вее над зградата на унгарскиот парламент“, рече Форстхофер, која беше избрана на конститутивната седница на парламентот со 193 од 199 гласа, нагласувајќи дека оваа „прва одлука“ во нејзината нова улога треба да претставува „прв симболичен чекор“ кон враќањето на централноевропската земја во Европа.

Проевропскиот конзервативец Петер Маѓар треба официјално да положи заклетва како премиер пред унгарскиот парламент во сабота, нешто помалку од еден месец по неговата убедлива победа на парламентарните избори против националистот Виктор Орбан.

По еуфоријата од победата, во која Унгарците танцуваа и пееја по улиците на Будимпешта, очекувањата се големи од човекот кој вети „промена на режимот“ за да се стави крај на корупцијата и нападите врз слободите што го обележаа 16-годишното владеење на Орбан.

Унгарија, исто така, се соочува со голем број економски предизвици, почнувајќи со стагнација на економијата и влошување на јавните услуги, што бара структурни реформи што ќе одземат време.

Петер Маѓар (45) ќе положи заклетва на инаугуративната седница на парламентот, која започна наутро.

Церемониите по повод неговата инаугурација во саботата, и во и надвор од Парламентот, беа исполнети со симболика, со знамиња и музика што оддаваа почит на членството на Унгарија во ЕУ, нејзиното големо ромско малцинство и унгарските малцинства што живеат во соседните земји.