Лидерите на учесниците во Процесот за соработка во Југоисточна Европа (ПСЈИЕ), на Самитот одржан вчера под претседавањето на Софија, ја усвоија Софиската декларација на Самитот на ПСЈИЕ, со што беа одбележани 30 години регионална сопственост и беше потврдена континуираната важност на соработката, стабилноста, безбедноста и одржливоста во Југоисточна Европа. 
Лидерите на ПСЈИЕ, исто така, го одобрија Годишниот извештај на Советот за регионална соработка (RCC), кој сега е достапен на веб-страницата на RCC, како и Среднорочната ревизија на Стратегијата SEE2030, потврдувајќи ја поддршката за работата на RCC во унапредувањето на регионалната соработка, европската интеграција и постигнувањето конкретни резултати за граѓаните, бизнисите и институциите.
Обраќајќи се на Самитот, генералниот секретар на RCC, Амер Капетановиќ, истакна дека Југоисточна Европа располага со функционален механизам за регионална соработка, конкретни резултати, јасна јавна поддршка и стабилна поддршка од владите, но дека размерите и брзината на глобалните промени бараат посилен стратешки одговор.
„Пред триесет години, ПСЈИЕ помогна да се врати навиката за дијалог. Денес, треба да помогне да се изгради навиката за стратешко испорачување на резултати. Нашиот регион се соочува со триаголник на притисоци: демографија, продуктивност и отпорност. Доколку не се адресираат, овие притисоци можат да се претворат во сериозни закани. Затоа Југоисточна Европа не може да си дозволи фрагментирани одговори на заедничките структурни предизвици. Регионалната соработка не е слоган. Таа е неопходност“, изјави генералниот секретар на RCC, Амер Капетановиќ.
Лидерите на ПСЈИЕ го поздравија Годишниот извештај на RCC и го пофалија неговуиот придонес во зајакнувањето на соработката, координацијата и испораката на резултати во регионот. Тие изразија поддршка за натамошната работа на RCC во претворањето на политичките приоритети во практични резултати и ја нагласија важноста од регионална платформа способна да одговори на заедничките предизвици на постратешки и покоординиран начин.
Во Софиската декларација од Самитот, учесниците во ПСЈИЕ го признаа придонесот на RCC како оперативна рака на ПСЈИЕ во унапредувањето на регионалната соработка, ја препознаа неговата додадена вредност како центар на регионалната соработка и го охрабрија претстојното претседавање на Букурешт да продолжи со зајакнувањето на синергијата меѓу ПСЈИЕ и RCC, вклучително и преку олеснување на работата на RCC во поддршка на рамката на ПСЈИЕ и европските аспирации на учесниците во ПСЈИЕ.
Декларацијата, исто така, ја потврди европската перспектива на учесниците во ПСЈИЕ кои аспирираат да и се приклучат на Унијата, ја нагласи важноста на инклузивната регионална соработка и добрососедските односи и ја препозна улогата на Заедничкиот регионален пазар во унапредувањето на економската интеграција и интеграцијата во Единствениот пазар на ЕУ.
Самитот заврши со официјалното примопредавање на претседавањето со ПСЈИЕ од Софија на Букурешт, кој во наредниот период ќе ја продолжи агендата за регионална соработка.
