Велика Британија и Европската Унија воведоа нови санкции против претставници на руското воено разузнавање (ГРУ), како и против физички и правни лица обвинети за учество во злонамерни кибероперации против европските земји и нивните партнери, јавува Би-Би-Си.

Во соопштението од Советот на ЕУ се вели дека Европската унија и нејзините земји-членки ги осудуваат „злонамерните сајбер активности на Русија“ и употребата на мрежа од државни и недржавни актери, вклучувајќи разузнавачки служби, групи за сајбер криминал, хактивисти и приватни компании.

Брисел вели дека 16-тиот центар на руската Федерална служба за безбедност (ФСБ) ги координира активностите на неколку хакерски групи, вклучувајќи ја и ТУРЛА. ЕУ тврди дека со години единицата вршела сајбер шпионажа и напади врз Европската Унија, Украина и други партнерски земји , вклучително и инфилтрација во владини системи и саботажа на критична инфраструктура.

Според податоците на ЕУ, од 2010 година, центарот спроведува сајбер шпионски операции против стратешки државни институции во Франција, а од 2025 година ги насочува своите активности и против одбранбената индустрија на земјата. Исто така, се тврди дека негови цели биле државни институции во Германија и критична инфраструктура во Полска, вклучувајќи ги и термоцентралите.

Британската министерка за внатрешни работи Ивет Купер изјави дека новите санкции се насочени кон „самото јадро на мрежите за сајбер криминал што ја поддржуваат руската државна агресија“.

„Од насочување на криминалци да напаѓаат бизниси до напади врз енергетскиот систем на Полска во сред зима, руската држава продолжува да ја поткопува безбедноста на Европа“, рече Купер.

Британските санкции вклучуваат 24 физички и правни лица, вклучувајќи ги и некои лидери на ГРУ, Вјачеслав Стафеев, Иван Сенин и Иван Касјаненко, обвинети од Лондон за водење на сајбер и хибридни операции.

Европската унија воведе санкции врз девет лица и три компании, вклучувајќи го и Иван Касјаненко.

Во меѓувреме, германското Министерство за надворешни работи го повика рускиот амбасадор во Берлин откако Европската унија ја обвини Москва за извршување кибернапади.